السلام عليكم،

قبل فترة كتبت تغريدات عن أهمية خوض تجارب جديدة وأنها سبب لزيادة المخزون اللغوي والقدرة الكتابية واللي بدورهم يساعدونا على التعبير عن أنفسنا. اختتمت تلك التغريدات بقولي إن التعبير عن الذات قيمة مهمة في حد ذاتها.

والحقيقة، إني هذاك الوقت مافكرت بأهمية القدرة على التعبير.. وكنت آخذها كمسلمة إنها شيء مهم، وكنت حاب أسكر الموضوع فقلت ماقلت.

لكن الحين أبي أعود لهذيك النقطة وأتكلم عن أهمية القدرة على التعبير.

أشوف القدرة على التعبير (العبارة هذي قاعدة تتكرر كثير، خلونا نختصرها بـ”الكتابة”) معيار ممتاز لتحكم على وضوح فكرة في بالك. أحس واضح أهمية وجود هالمعيار؛ لأن ماتقدر تطور الفكرة بدون ماتعرف إذا هي ناقصة أصلا ولا لا. بس كيف تكون الكتابة معيار لوضوح الفكرة؟

لو الفكرة مو واضحة، ماراح تقدر تعبر عنها بدقة. وش أعني لما أقول التعبير بدقة؟ يعني إن كل المتلقين/القراء تتكون بذهنهم صورة (شبه) مطابقة للصورة اللي ببالك. فلو كانت الصورة اللي ببالك ينقصها بعض الملامح، أفضل شي راح تقدر تسويه إنك توصل صورة ناقصة للمتلقي… الي بدوره راح يحاول سد هالفراغات، وكل متلقي راح يسدها بطريقة مختلفة. ويطلع بالنهاية كل قارئ خرج بتصور مختلف تماما عما كنت تقصده. ولهذا، أحس إذا قدرت تعبر تعبير دقيق عن فكرة ما فهذا يعني -منطقيا- إن الفكرة ببالك واضحة.

طبعا كون عندك أفكار واضحة هذي قيمة بحد ذاتها :P